ᬢᬸᬓᬂᬳᬯᬸᬗᬦ᭄᭟

ᬳᬤᬢᬸᬢᬸᬭᬦ᭄ᬲᬢ᭄ᬯᬤᬾᬰᬳᬦᬾᬦᭀᬗᭀᬲ᭄ᬤᬶᬢᬸᬦ᭄ᬤᬸᬦ᭄ᬩᬸᬓᬶᬢᬾ᭞ᬓᬵᬧᬶᬢ᭄ᬩᬵᬦ᭄ᬢᬸᬓᬤ᭄᭞ᬫᬵᬤᬦ᭄ᬢᬸᬓᬤ᭄ᬳᬬᬸᬂ᭟ᬤᬸᬕᬲᬾᬫᬮᬸᬤᬶᬤᬾᬰᬦᬾᬢᭀᬢᭀᬦᬦ᭄ᬢᬸᬲᬶᬂᬳᬤᬘᬭᬶᬓ᭄᭞ᬓ᭄ᬭᬫᬤᬾᬰᬦᬾᬮᬶᬬᬸᬦᬦ᭄ᬫᬕᬭᬧᬦ᭄ᬤᬶᬢᭂᬕᬮᬾ᭟ᬧᬫᬸᬮᬦ᭄ᬫᬸᬮᬦ᭄ᬓ᭄ᬭᬫᬦᬾᬤᬶᬢᬸ᭞ᬳᬤᬳᬦᬾᬫᬫᬸᬮᬯᭀᬄᬯᭀᬳᬦ᭄ᬳᬦᬾᬤᬤᬶᬢᬢᭂᬤᬦ᭄ᬩᬸᬭᭀᬦ᭄ᬤᬶᬳᬮᬲᬾ᭟ᬧᬫᬸᬧᭀᬦᬾᬳᬸᬮᬶᬤᬶᬢᭂᬕᬮᬾᬳᭂᬦ᭄ᬢᭀᬳᬦᬾᬤᬳᬭᬲᬭᬳᬶᬦᬩᬵᬦ᭄ᬓ᭄ᬭᬫᬦᬾ᭟ᬦᬸᬚᬸᬫᬲᬦ᭄ᬳᬸᬚᬦ᭄ᬓ᭄ᬭᬫᬦᬾᬮᬶᬬᬸᬦᬦ᭄ᬳᬦᬾᬦᬦ᭄ᬤᬸᬃᬨᬮᬯᬷᬚ᭞ᬯᬶᬭᬾᬄᬢᭂᬕᬮᬦᬾᬫᬳᬦ᭄ᬬᬾᬄᬳᬸᬚᬦ᭄᭟ᬨᬮᬯᬷᬚᬦᬾᬳᬦᬾᬓᬢᬦ᭄ᬤᬸᬃᬮᬸᬯᬶᬭᬾ᭝ᬧᬤᬶᬕᬕ᭞ᬚᬕᬸᬂᬮᬦ᭄ᬓᬘᬂᬓᬘᬗᬦ᭄᭟ᬤᬶᬤᬾᬰᬦᬾᬳᭂᬦ᭄ᬢᭀᬮᬶᬬᬸᬧᭂᬲᬦ᭄ᬳᬤᬳᭂᬦ᭄ᬢᬶᬓᬦ᭄ᬯᭀᬄᬯᭀᬳᬦ᭄᭞ᬳᬶᬕ᭄ᬬᬦ᭄ᬲᬗ᭄ᬓᬦᬶᬂᬧᬫᬸᬮᬦᬢᭂᬓᬾᬦ᭄ᬓ᭄ᬭᬫᬦᬾᬯ᭄ᬬᬤᬶᬦ᭄ᬫᭂᬦ᭄ᬢᬶᬓ᭄ᬧᬤᬶᬤᬶᬦᬤᬶᬳᬮᬲᬾ᭟ᬲᬗ᭄ᬓᬦᬶᬂᬮᬶᬬᬸᬳᬤᬧᬸᬜᬦ᭄ᬯᭀᬄᬯᭀᬳᬦ᭄ᬤᬶᬤᬾᬰᬦᬾᬳᭂᬦ᭄ᬢᭀᬮᬦ᭄ᬢᬲ᭄ᬓᬵᬤᬦᬶᬦ᭄ᬤᬾᬰᬩ᭄ᬯᬳᬦ᭄᭟

ᬳᬦᬾᬚᬦᬶᬓᬘᬭᬶᬢᬬᬂᬦᬸᬚᬸᬫᬸᬲᬶᬫ᭄ᬳᬸᬚᬦ᭄᭞ᬢᬦᬄᬢᭂᬕᬮᬦᬾᬲᬬᬦ᭄ᬩᭂᬲᭂᬕ᭄ᬓᭂᬦᬬᬾᬄᬳᬸᬚᬦ᭄᭟ᬯᬶᬭᬾᬄᬲᬸᬩᬫᬲᬦ᭄ᬳᬸᬚᬦ᭄ᬓ᭄ᬭᬫᬤᬾᬰᬦᬾᬮᬶᬬᬸᬳᬦᬾᬫᬓᬶᬦ᭄ᬓᬶᬦᬦ᭄ᬮᬓᬃᬦᬦ᭄ᬤᬸᬃᬨᬮᬯᬷᬚᬧᬫᭂᬓᬲ᭄ᬦᬾᬧᬤᬶᬕᬕ᭟ᬧᬤᬶᬕᬕᬳᭂᬦ᭄ᬢᭀᬧᬤᬶᬳᬦᬾᬧᬸᬮᬦᬤᬶᬢᭂᬕᬮᬾ᭞ᬯᬶᬭᬾᬄᬳᭂᬦ᭄ᬢᬶᬓᬦ᭄ᬧᬤᬶᬦᬾᬳᭂᬦ᭄ᬢᭀᬢᬸᬲᬶᬂᬮᬶᬬᬸᬜᬭᬢᬂᬬᬾᬄ᭟ᬧᬭᬧᭂᬢᬦᬶᬦᬾᬳᬤᬳᬦᬾᬫᬭᬦᬸᬫ᭄ᬩᭂᬕ᭄ᬳᬤᬫᬲᬶᬄᬳᬦᬾᬲᬸᬩᬦᬚᬸᬓ᭄᭟ᬤᬶᬲᬸᬩᬦᬾᬫᬢᬸᬯᬸᬄ᭞᭑᭐᭐᭞ᬤᬶᬦᬗᬦ᭄ᬢᭂᬕ᭄᭞᭑᭒᭕᭞ᬤᬶᬦᬲᬸᬩᬲᬦ᭄ᬤᬂᬳᬜᬶ᭟ᬤᬶᬲᬸᬩᬦᬾᬫᬓᭂᬚᬂᬧᬭᬧᭂᬢᬦᬶᬦᬾᬲᬸᬯᬸᬤ᭄ᬫᬜᬶ᭞ᬤᬶᬢᬸᬮᬦ᭄ᬢᬲ᭄ᬮᬶᬬᬸᬧᭂᬢᬦᬶᬦᬾᬤᭀᬢ᭄ᬗᭂᬮᬄᬘᬭᬶᬓ᭄ᬳᬦᬾᬫᬶᬲᬶᬬᬾᬄ᭟ᬲᬗ᭄ᬓᬦᬶᬂᬩᬸᬓᬓᬾᬢᭀ᭞ᬤᬶᬢᬸᬮᬦ᭄ᬢᬲ᭄ᬧᬭᬧᭂᬢᬦᬶᬦᬾᬲᬗ᭄ᬓᭂᬧ᭄᭟ᬤᬶᬲᬸᬩᬦᬾᬲᬗ᭄ᬓᭂᬧ᭄ᬳᬤᬧᬫᬸᬢᬸᬲ᭄ᬮᬓᬃᬗᬮᬶᬄᬬᬾᬄᬳᬗ᭄ᬕᭀᬦ᭄ᬗᭂᬬᬾᬳᬶᬦ᭄ᬘᬭᬶᬓ᭄᭟ᬤᬶᬢᬸᬮᬦ᭄ᬢᬲ᭄ᬓ᭄ᬭᬫᬦᬾᬢᭂᬤᬸᬦ᭄ᬦᬸᬮᬸᬄᬲᬶᬲᬶᬦ᭄ᬢᬸᬓᬤᬾᬮᬓᬃᬗᬭᬶᬜ᭄ᬘᬶᬓᬦ᭄ᬗᬳᬾᬳᭂᬫ᭄ᬧᭂᬦ᭄᭟ᬤᬶᬲᬸᬩᬦᬾᬦᭂᬓᭂᬤ᭄ᬤᬶᬢᭀᬗᭀᬲ᭄ᬳᬦᬾᬭᬲᬬᬗᬜᬶᬤᬬᬂᬗᭂᬫ᭄ᬧᭂᬮ᭄ᬤᬶᬢᬸᬮᬦ᭄ᬢᬲ᭄ᬓ᭄ᬭᬫᬦᬾᬩᬸᬯᬶᬦ᭄ᬮᬓᬃᬲᬗ᭄ᬓᭂᬧ᭄ᬫᬧᬳᬶᬢᬸᬗᬦ᭄ᬮᬓᬃᬗᬳᬾᬳᭂᬫ᭄ᬧᭂᬮᬦ᭄᭟ᬲᬸᬩᬚᬗ᭄ᬓᭂᬧ᭄ᬧᬫᬸᬢᬸᬲᬾ᭞ᬮᬦ᭄ᬢᬲ᭄ᬓ᭄ᬭᬫᬦᬾᬢᭂᬤᬸᬦ᭄ᬫᬕᬳᬾᬓᬢᬸᬓᬤᬾᬗᬳᬾᬳᭂᬫ᭄ᬧᭂᬮᬦ᭄᭟ᬫᬓᬸᬤᬂᬓᬸᬤᬂᬩᬸᬮᬦ᭄ᬲᬸᬩᬮᬶᬯᬢ᭄ᬲᬕᬾᬢ᭄ᬚᬦᬶᬳᭂᬫ᭄ᬧᭂᬮᬦᬾᬲᬸᬩᬧ᭄ᬭᬕᬢ᭄᭟ᬳᬧᬂᬗᬶᬤᬂᬗᬩᬬᬾᬳᬾᬳᬗ᭄ᬕᭀᬦ᭄ᬗᭂᬬᬾᬳᬶᬦ᭄ᬘᬭᬶᬓ᭄ᬤᬶᬤᬾᬰ᭞ᬫᬸᬲ᭄ᬢᬶᬳᬤᬳᬯᬸᬗᬦ᭄᭞ᬤᬶᬢᬸᬮᬦ᭄ᬢᬲ᭄ᬩᬸᬯᬶᬦ᭄ᬓ᭄ᬭᬫᬦᬾᬚᬦᬶᬮᬓᬃᬗᬮᬶᬄᬢᬸᬓᬂᬳᬯᬸᬗᬦ᭄᭟

ᬓᬘᬭᬶᬢᬬᬂᬚᬦᬶᬓ᭄ᬭᬫᬦᬾᬲᬗ᭄ᬓᭂᬧ᭄ᬮᬓᬃᬗᬮᬶᬄᬢᬸᬓᬂᬳᬯᬸᬗᬦ᭄ᬲᬳᬮᬓᬃᬗᬤᭂᬕᬂᬧ᭄ᬭᬚᬸᬭᬸᬲᬸᬩᬓ᭄᭞ᬲᬯᬶᬭᬾᬄᬲᬸᬩᬮᬓᬃᬗᭂᬮᬄᬘᬭᬶᬓ᭄ᬧᬭᬧᭂᬢᬦᬶᬦᬾ᭟ᬕᭂᬮᬶᬲᬂᬘᬭᬶᬢᬚᬦᬶᬲᬸᬩᬳᬤᬧ᭄ᬭᬚᬸᬭᬸᬲᬸᬩᬓ᭄ᬧᬦ᭄ᬘᭀᬫ᭄ᬩᭀᬮ᭄ᬤᬤᬶᬧᬓᬲᬾᬄ᭞ᬦᬂᬓᭀᬫᭀᬤᬤᬶᬧᬜᬭᬶᬓᬦ᭄ᬲᬸᬩᬓ᭄ᬮᬦ᭄ᬧᬦ᭄ᬦᬤᬶᬤᬤᬶᬧᬢᭂᬗᭂᬦ᭄ᬲᬸᬩᬓ᭄᭟ᬤᬶᬲᬸᬩᬦᬾᬚᬗ᭄ᬓᭂᬧ᭄ᬧ᭄ᬭᬚᬸᬭᬸᬲᬸᬩᬓᬾᬤᬶᬢᬸᬮᬦ᭄ᬢᬲ᭄ᬗᬸᬢᬸᬲ᭄ᬲᬶᬮᬶᬄᬢᬸᬗ᭄ᬕᬶᬮ᭄ᬓ᭄ᬭᬫᬲᬸᬩᬓᬾᬫᬵᬤᬦ᭄ᬦᬂᬚᬦᬶᬮᬦ᭄ᬧᬦ᭄ᬧᬮᭀᬦ᭄ᬗᬮᬶᬄᬢᬸᬓᬂᬳᬯᬸᬗᬦ᭄᭞ᬯᬶᬭᬾᬄᬳᬤᬳᭀᬃᬢᬶᬤᬶᬢᬸᬤᬶᬤᬾᬰᬦᬾᬓᬗᬶᬦ᭄ᬳᬤᬓᭀᬦᬾᬢᬸᬓᬂᬳᬯᬸᬗᬦ᭄ᬳᬦᬾᬲᬸᬩᬓᬮᭀᬓ᭄ᬢᬄᬤᬸᬯᭂᬕ᭄ᬗᬯᬸᬂ᭟ᬧᬦ᭄ᬧᬮᭀᬦ᭄ᬫᬢᬸᬃᬢᭂᬓᬾᬦᬶᬂᬧ᭄ᬭᬚᬸᬭᬸᬲᬸᬩᬓᬾ᭞ᬓᬾᬦᬾᬫᬸᬜᬶᬦᬾ᭞ᬢᬶᬢ᭄ᬬᬂᬲᬗ᭄ᬕᬸᬧ᭄ᬲᬋᬂᬓᬮᬶᬄᬚᬕᬶᬓᬤᬾᬰᬦᬾᬓᬗᬶᬦ᭄᭞ᬲᬓᬾᬯᬦ᭄ᬢᭂᬦ᭄ᬲᬧᬸᬦᬧᬶᬧᬶᬓᭀᬮᬶᬄᬧᬚᬮᬦ᭄ᬢᬶᬢ᭄ᬬᬂᬚᬕᬶᬬᬢᬸᬭᬂᬢᬶᬢ᭄ᬬᬂᬫᬮᬶᬄᬭᬶᬂᬤᬦᬾᬧ᭄ᬭᬚᬸᬭᬸᬲᬳᬓ᭄ᬭᬫᬲᬸᬩᬓ᭄ᬲᬫᬶ᭟ᬩᬸᬓᬓᬾᬢᭀᬧᬦ᭄ᬧᬮᭀᬦ᭄ᬫᬢᬸᬃᬭᬶᬂᬧᬲᬗ᭄ᬓᭂᬧᬦ᭄᭟ᬳᬶᬗ᭄ᬕᬶᬄᬩᭂᬘᬶᬓ᭄ᬓᬤᬶᬲᬧᬸᬦᬶᬓ᭞ᬓᬾᬢᭀᬓ᭄ᬭᬫᬦᬾᬲᬸᬫᬸᬬᬸᬩ᭄ᬫᬓᭂᬚᬂ᭟

ᬢᬦ᭄ᬓᬘᬭᬶᬢᬬᬂᬤᬶᬚᬮᬦ᭄᭞ᬲᬕᬾᬢ᭄ᬦᭂᬓᭂᬤ᭄ᬳᬶᬦᬂᬚᬦᬶᬮᬦ᭄ᬧᬦ᭄ᬧᬮᭀᬦ᭄ᬤᬶᬤᬾᬰᬦᬾᬓᬗᬶᬦ᭄ᬢᬸᬃᬫᬢᬓᭀᬦ᭄ᬢᬓᭀᬦ᭄ᬳᬶᬬᬢᭂᬓᬾᬦᬶᬦ᭄ᬳᬦᬓᬾᬳᬦᬾᬢᭂᬧᬸᬓᬶᬦᬤᬶᬢᬸ᭟ᬳᬶᬬᬳᬚᬓᬤᬤ᭄ᬯᬦᬓᭀᬦᬂᬤᬶᬚᬓᭀᬦᬾᬳᬸᬫᬄᬢᬸᬓᬂᬳᬯᬸᬗᬦᬾ᭟ᬤᬶᬲᬸᬩᬦᬾᬫᬓᬸᬤᬂᬳᬦᬓ᭄ᬢᬓᭀᬦᬶᬦᬤᬶᬤᬾᬰᬦᬾᬓᬗᬶᬦ᭄᭞ᬳᬤᬮᬦ᭄ᬢᬲ᭄ᬦᬸᬚᬸᬳᬶᬦ᭄ᬳᬸᬫᬳ᭄ᬦᬾᬢᬸᬓᬂᬳᬯᬸᬗᬦ᭄᭟ᬤᬶᬢᬸᬮᬦ᭄ᬢᬲ᭄ᬗᬾᬜ᭄ᬘᭀᬮᬦ᭄ᬳᬶᬦᬂᬚᬦᬶᬮᬦ᭄ᬧᬦ᭄ᬧᬮᭀᬦ᭄ᬓᬳᬸᬫᬄᬦᬾᬢᬸᬓᬂᬳᬯᬸᬗᬦ᭄᭟ᬚ᭄ᬭᭀ... ᬚ᭄ᬭᭀ... ᬚ᭄ᬭᭀᬢᬸᬓᬂᬳᬯᬸᬗᬦ᭄᭞ᬓᬾᬢᭀᬳᬶᬦᬂᬚᬦᬶᬫᬕᭂᬮᬸᬭᬦ᭄᭟ᬳᬶᬗ᭄ᬕᬶᬄᬢᬶᬬᬂ᭞ᬲᬶᬭᬲᬦᬾᬫᬕᭂᬮᬸᬭᬦ᭄᭞ᬓᬢᬶᬫ᭄ᬩᬮᬶᬦ᭄ᬳᭀᬮᬶᬄᬲᬂᬲᬦᬾᬦᬸᬯᬾᬦᬂᬳᬸᬫᬄ᭟ᬢᬶᬬᬂᬳᬸᬢᬸᬲᬦ᭄ᬧᬸᬦᬶᬓᬶ᭞ᬲᬓᬶᬂᬲᬸᬩᬓ᭄ᬩ᭄ᬯᬳᬦ᭄ᬚᬓ᭄ᬢᬶᬳᬶᬭᬶᬓᬶᬚᭂᬭᭀᬦᬾᬲᬦᬾᬳᬸᬦᬶᬂᬫᬓᬃᬵᬬᬳᬯᬸᬗᬦ᭄᭞ᬢᬶᬢ᭄ᬬᬂᬚᬕᬶᬗᬋᬋᬄᬢᬸᬓᬂᬳᬯᬸᬗᬦ᭄᭟ᬩᬸᬓᬓᬾᬢᭀᬩᬸᬯᬶᬦ᭄ᬳᬶᬦᬂᬚᬦᬶᬦᬶᬫ᭄ᬩᬮ᭄᭟

ᬚᬦᬶᬓᬘᬭᬶᬢᬬᬂᬳᬶᬦᬂᬚᬦᬶᬮᬦ᭄ᬧᬦ᭄ᬧᬮᭀᬦ᭄ᬗᬚᬓ᭄ᬚ᭄ᬭᭀᬢᬸᬓᬂᬳᬯᬸᬗᬦ᭄ᬫᬵᬤᬦ᭄ᬚ᭄ᬭᭀᬧᬲᭂᬓ᭄ᬫᬧᬳᬶᬢᬸᬗᬦ᭄ᬗᭀᬭᬳᬂᬢᬢᬸᬚᭀᬦᬾᬢᭂᬓᬓᭂᬫ᭟ᬚ᭄ᬭᭀᬧᬲᭂᬓ᭄ᬜᬗ᭄ᬕᬸᬧᬶᬦ᭄ᬮᬓᬃᬗᬯᬸᬂᬲᬓᬾᬯᬮᬳᬤᬧᬶᬦᬸᬦᬲᬾᬢᭂᬓᬾᬦᬶᬦ᭄ᬓ᭄ᬭᬫᬲᬸᬩᬓᬾᬧᬶᬦᬓᬳᬸᬧᬄ᭞ᬤᬶᬲᬸᬩᬦᬾᬧ᭄ᬭᬕᬢ᭄ᬗᬳᬾᬳᬯᬸᬗᬦ᭄ᬢᬸᬃᬬᬾᬳᬾᬲᬸᬩᬦᭂᬓᭂᬤ᭄ᬤᬶᬤᬾᬰ᭟ᬦᬄ᭞ᬧᬸᬦᬶᬓᬶᬚ᭄ᬭᭀᬳᬸᬢᬸᬲᬦ᭄᭞ᬢᬶᬬᬂᬫᬶᬲᬤ᭄ᬬᬚᬕᬶᬗᬯᬸᬂᬭᬶᬂᬕᭂᬦᬄᬚ᭄ᬭᭀᬦᬾ᭞ᬲᬓᬾᬯᬦ᭄ᬢᭂᬦ᭄ᬯᬾᬦ᭄ᬢᭂᬦ᭄ᬧᬶᬦᬸᬦᬲ᭄ᬢᬶᬬᬂᬭᬶᬲᬫ᭄ᬧᬸᬦ᭄ᬢᭀᬬᬦᬾᬫ᭄ᬭᬲᬶᬤᬬᬂᬫᭂᬫ᭄ᬩᬄᬭᬯᬸᬄᬭᬶᬂᬤᬾᬰ᭞ᬫᬗ᭄ᬤᬚ᭄ᬭᭀᬦᬾᬲᬶᬤ᭄ᬥᬗᬶᬘᬾᬦ᭄ᬢᬶᬬᬂᬳᬸᬧᬄᬩᭂᬭᬲ᭄ᬳᬫᬸᬚᬸᬗᬦ᭄ᬧᬲᭀᬢᬦᬳᬾᬧᬸᬦᬶᬓᬶ᭞ᬲᬓᬾᬯᬦ᭄ᬢᭂᬦ᭄ᬲᬫ᭄ᬧᬸᬦᬂᬓᬦ᭄ᬢᭀᬲ᭄ᬳᬸᬮᬸᬂᬧᬸᬦᬶᬓᬤᬤᭀᬲ᭄ᬳᬫᬸᬚᬸᬗᬦ᭄ᬭᬶᬂᬧᬲᭀᬦᬾᬧᬸᬦᬶᬓᬶ᭟ᬩᬸᬓᬓᬾᬢᭀᬫᬸᬜᬶᬦᬾᬚ᭄ᬭᭀᬧᬲᭂᬓ᭄ᬲᬫ᭄ᬩᬶᬮᬗᬗᬾᬤᬾᬗᬂᬧᬲᭀᬢᬦᬄᬳᬦᬾᬮᬓᬃᬳᬗ᭄ᬕᭀᬦᬯᬤᬄᬳᬸᬧᬄᬗᬯᬸᬂ᭟ᬤᬶᬲᬸᬩᬦᬾᬲᬸᬯᬸᬤ᭄ᬫᬧᬳᬶᬢᬸᬗᬦ᭄ᬩᬸᬓᬓᬾᬢᭀ᭞ᬮᬦ᭄ᬢᬲ᭄ᬳᬶᬦᬂᬚᬦᬶᬮᬦ᭄ᬧᬦ᭄ᬧᬮᭀᬦ᭄ᬫᬧᬫᬶᬢ᭄ᬫᬸᬮᬶᬄᬮᬓᬃᬫᬢᬸᬃᬢᭂᬓᬾᬦ᭄ᬧ᭄ᬭᬚᬸᬭᬸᬲᬸᬩᬓ᭄ᬮᬦ᭄ᬓ᭄ᬭᬫᬦᬾᬧᬶᬓᭀᬮᬶᬄᬧᬳᬶᬢᬸᬗᬦᬾᬗᬚᬓ᭄ᬢᬸᬓᬂᬳᬯᬸᬗᬦᬾ᭟ᬲᬸᬩᬚᬦᬶᬢᭂᬓᭂᬤ᭄ᬤᬶᬤᬾᬰᬳᬶᬦᬂᬚᬦᬶᬮᬦ᭄ᬧᬦ᭄ᬧᬮᭀᬦ᭄ᬮᬦ᭄ᬢᬲ᭄ᬫᬢᬸᬃᬢᭂᬓᬾᬦ᭄ᬚ᭄ᬭᭀᬧᬓᬲᬾᬄ᭟ᬚ᭄ᬭᭀᬫᬮᬶᬄᬧᬶᬤᬦ᭄ᬧᬸᬦᬶᬓᬶᬚᬕᬶᬲᬗ᭄ᬓᭂᬧ᭄᭞ᬢᬶᬬᬂᬚᬕᬶᬫᬢᬸᬃᬧᭀᬮᬶᬄᬢᬶᬬᬗᬾᬲᬋᬂᬓᬮᬶᬄᬗᬭᬸᬭᬸᬄᬢᬸᬓᬂᬳᬯᬸᬗᬦ᭄᭟ᬓᬾᬢᭀᬳᬶᬦᬂᬚᬦᬶᬫᬢᬸᬃᬢᭂᬓᬾᬦ᭄ᬚ᭄ᬭᭀᬧᬓᬲᬾᬄ᭟ᬦᬄᬬᬾᬦᬶᬂᬩᬸᬓᬓᬾᬢᭀ᭞ᬤᬶᬯ᭄ᬭᬺᬳᬲ᭄ᬧᬢᬶᬳᬦᬾᬮᬓᬃᬢᭂᬓᬓ᭄ᬭᬫᬦᬾᬮᬓᬃᬲᬗ᭄ᬓᭂᬧᬂ᭟ᬚ᭄ᬭᭀᬧᬓᬲᬾᬄᬦᬶᬫ᭄ᬩᬮ᭄᭟ᬚᬦᬶᬲᬸᬩᬮᬦ᭄ᬢᬲ᭄ᬕᬮᬄᬦᬾᬲᬗ᭄ᬓᭂᬧ᭄᭞ᬤᬶᬢᬸᬳᬶᬦᬂᬚᬦᬶᬮᬦ᭄ᬧᬦ᭄ᬧᬮᭀᬦ᭄ᬫᬢᬸᬃᬢᭂᬓᬾᬦᬶᬂᬓ᭄ᬭᬫᬦᬾᬳᬶᬦ᭄ᬤᬶᬓ᭄ᬧᬶᬓᭀᬮᬶᬄᬦᬾᬗᬮᬶᬄᬢᬸᬓᬂᬳᬯᬸᬗᬦ᭄ᬲᬫ᭄ᬩᬶᬮᬗᬗᬾᬤᬾᬗᬂᬧᬲᭀᬢᬦᬄ᭟ᬓ᭄ᬭᬫᬦᬾᬫᬓᭂᬚᬂᬲᬸᬫᬸᬬᬸᬩ᭄᭞ᬜᬗ᭄ᬕᬸᬧᬶᬦ᭄ᬮᬓᬃᬫᬬᬄᬳᬸᬧᬄᬗᬯᬸᬂᬳᬚᬶᬩᭂᬭᬲ᭄ᬳᬫᬸᬚᬸᬗᬦ᭄ᬧᬲᭀᬢᬦᬳᬾᬳᭂᬦ᭄ᬢᭀᬓᬤᬶᬧᬶᬦᬸᬦᬲ᭄ᬢᬸᬓᬂᬳᬯᬸᬗᬦ᭄᭟ᬓ᭄ᬭᬫᬲᬸᬩᬓᬾᬫᬭᬲᬫᬸᬤᬄᬫᬬᬄᬳᬸᬧᬄᬗᬯᬸᬂᬯᬶᬭᬾᬄᬓᬢᬶᬗᬮᬶᬦ᭄ᬧᬲᭀᬢᬦᬳᬾᬳᭂᬦ᭄ᬢᭀᬘᭂᬭᬶᬓ᭄ᬧᭂᬲᬦ᭄᭟

ᬕᭂᬮᬶᬲᬂᬲᬢ᭄ᬯ᭞ᬲᬕᬾᬢ᭄ᬲᬸᬩᬧ᭄ᬭᬕᬢ᭄ᬳᬯᬸᬗᬦ᭄ᬢᬸᬃᬬᬾᬳᬾᬲᬸᬩᬫᭂᬫ᭄ᬩᬄᬦᭂᬓᭂᬤ᭄ᬤᬶᬤᬾᬰᬦᬾ᭟ᬳᬶᬚ᭄ᬭᭀᬧᬲᭂᬓ᭄ᬮᬓᬃᬦᬕᬶᬄᬳᬸᬧᬄᬢᭂᬓᬾᬦᬶᬂᬓ᭄ᬭᬫᬲᬸᬩᬓᬾ᭟ᬤᬦᬾᬚ᭄ᬭᭀᬧᬓᬲᬾᬄᬩᬸᬯᬶᬦ᭄ᬗᬯᬾᬦ᭄ᬢᭂᬦᬂᬲᬗ᭄ᬓᭂᬧ᭄ᬢᬸᬃᬓᬲᬋᬗᬶᬦ᭄ᬢᬸᬓᬂᬳᬯᬸᬗᬦᬾᬚ᭄ᬭᭀᬧᬲᭂᬓ᭄᭟ᬤᬶᬢᬸᬓ᭄ᬭᬫᬲᬸᬩᬓᬾᬗᬩᬩᭂᬭᬲ᭄ᬮᬓᬃᬳᬗ᭄ᬕᭀᬦᬫᬬᬄᬳᬸᬧᬄᬗᬯᬸᬂ᭟ᬤᬶᬲᬸᬩᬦᬾᬓᬧᬸᬧᬸᬮᬂᬤᬶᬧᬲᭀᬢᬦᬳᬾᬢᬸᬲᬶᬂᬜᬶᬤᬬᬂᬫᬸᬚᬸᬂᬩᭂᬭᬲᬾᬲᬩᬶᬮᬂᬳᭂᬚᬗᬶᬦᬲᭂᬢᬢᬳᬸᬮᬸᬂᬤᬤᬶᬦᬾᬫᬾᬭᬾᬲ᭄ᬩᭂᬭᬲᬾᬤᬶᬧᬲᭀᬦᬾ᭟ᬤᬶᬢᬸᬮᬦ᭄ᬢᬲ᭄ᬚ᭄ᬭᭀᬧᬲᭂᬓ᭄ᬫᬢᬸᬃ᭞ᬦᬶᬓᬶᬦᬾᬦ᭄ᬢᭂᬦ᭄ᬲᬶᬤ᭄ᬥᬫᬸᬚᬸᬂᬯᬦ᭄ᬢᬄᬫᬾᬭᬾᬲ᭄ᬫᬦ᭄ᬢᭂᬦ᭄᭞ᬩᭂᬭᬲ᭄ᬲᬦᬾᬳᬸᬮᬸᬂᬧᬸᬦᬶᬓᬓᬤᬶᬬᬢᬸᬃᬢᬶᬢ᭄ᬬᬂᬤᬸᬫᬸᬦ᭄ᬤᬤᭀᬲ᭄ᬕᭂᬮᬄᬢᬶᬢ᭄ᬬᬂ᭞ᬫᬗ᭄ᬓᬶᬦ᭄ᬲᬧᬸᬦᬧᬶ᭞ᬭ᭄ᬬᬦ᭄ᬢᬸᬓᬦ᭄ᬕᬮᬄᬢᬶᬢ᭄ᬬᬂᬧᭀᬮᬶᬄᬳᬸᬧᬄ᭟ᬤᬶᬢᬸᬧ᭄ᬭᬚᬸᬭᬸᬮᬦ᭄ᬓ᭄ᬭᬫᬲᬸᬩᬓᬾᬩᬶᬗᬸᬂᬯᬶᬭᬾᬄᬢᬸᬲᬶᬂᬜᬶᬤᬬᬂᬗᬳᬾᬦᬂᬧᬲᭀᬢᬦᬳᬾᬫᬸᬚᬸᬂᬫᬶᬲᬶᬩᭂᬭᬲ᭄᭞ᬲᬩᬶᬮᬂᬳᭂᬚᬗᬶᬦᬧ᭄ᬭᬕᬢ᭄ᬳᬸᬮᬸᬂ᭟ᬲᬯᬶᬭᬾᬄᬢᭂᬭᬸᬲ᭄ᬩᬸᬓᬓᬾᬢᭀᬓᬦ᭄ᬢᬶᬧᬤᬢᭂᬮᬸᬂᬓᬫ᭄ᬧᬶᬮ᭄ᬓ᭄ᬭᬫᬦᬾᬫᬧᭂᬲᬸᬢᬸᬲᬶᬂᬫᬲᬶᬄᬗᬶᬤᬂᬗᬳᬾᬫᬸᬚᬸᬂ᭞ᬤᬶᬢᬸᬮᬦ᭄ᬢᬲ᭄ᬳᬤᬲᬶᬮᬶᬄᬢᬸᬗ᭄ᬕᬶᬮ᭄ᬓ᭄ᬭᬫᬲᬸᬩᬓ᭄ᬫᬢᬸᬃ᭟ᬲᬶᬦᬫ᭄ᬧᬸᬭᬚ᭄ᬭᭀᬢᬸᬓᬂᬳᬯᬸᬗᬦ᭄᭞ᬚ᭄ᬭᭀᬦᬾᬧᬸᬦᬶᬓᬶᬫᭂᬮᭀᬕ᭄ᬫᭂᬮᭀᬕ᭄ᬢᬶᬢ᭄ᬬᬂᬲᬋᬂᬲᬫᬶᬧᬸᬦᬶᬓᬶ᭞ᬬᬾᬦᬶᬂᬳᬫᬸᬦᬶᬓᬶᬘᭂᬭᬶᬓ᭄ᬧᬲᭀᬚ᭄ᬭᭀᬦᬾᬓᬾᬦ᭄ᬓᬾᬦᬂᬢᬶᬬᬂᬮᬓᬃᬫᬸᬚᬸᬗᬂᬗᭂᬚᬗᬶᬦ᭄ᬩᭂᬭᬲ᭄᭞ᬲᬶᬦᬄᬮᬓᬃᬢᭂᬭᬸᬲ᭄ᬳᬸᬮᬸᬂ᭟ᬦᬶᬓᬶᬲᬫ᭄ᬧᬸᬦ᭄ᬓᬘᬸᬫ᭄ᬧᭀᬦᬶᬦ᭄᭞ᬢᬸᬃᬫᬗ᭄ᬓᬶᬦ᭄ᬕᬮᬄᬢᬶᬢ᭄ᬬᬂᬦᬫ᭄ᬧᬶᬳᬸᬧᬄ᭟ᬩᬸᬓᬓᬾᬢᭀᬚ᭄ᬭᭀᬧᬲᭂᬓ᭄ᬦᬶᬫ᭄ᬧᬮ᭄᭟ᬯᬶᬭᬾᬄᬤᬤᬶᬩᬶᬬᬸᬢᬲᬮᬶᬂᬫᭂᬲᬸᬯᬂᬧᬩᭂᬦᭂᬄᬤᬶᬧᬲᬗ᭄ᬓᭂᬧᬦ᭄᭞ᬧ᭄ᬭᬚᬸᬭᬸᬲᬸᬩᬓᬾᬮᬦ᭄ᬢᬲ᭄ᬦᬸᬦᬲ᭄ᬧᬦᭂᬧᬲ᭄ᬭᬶᬂᬧᬗᬤᬶᬮᬦ᭄᭟ᬦᬄ᭞ᬤᬶᬧᭂᬗᬤᬶᬮᬦ᭄ᬫᬭᬮᬦ᭄ᬢᬲ᭄ᬫᬳᬦ᭄ᬧᬦᭂᬧᬲ᭄ᬓᬤᬲᬭᬶᬦ᭄ᬩᬳᬦ᭄ᬫᬩ᭄ᬮᬶᬕ᭄ᬩᬕ᭄᭞ᬚ᭄ᬭᭀᬧᬲᭂᬓ᭄ᬦᬫ᭄ᬧᬶᬳᬸᬧᬄᬫᬦᬸᬢ᭄ᬲᬧᬢᬸᬢ᭄ᬜᬦᬾ᭞ᬢᬸᬃᬓ᭄ᬭᬫᬦᬾᬢᬸᬲᬶᬂᬩᬸᬯᬶᬦ᭄ᬫᭂᬭᬢᬂᬳᬸᬧᬳᬾᬢᭀᬢᭀᬦᬦ᭄᭟

ᬧᬩᭂᬲᭂᬦ᭄ᬲᬢ᭄ᬯᬦᬾᬳᭂᬦᬾ᭞ᬫᭂᬮᬳᬂᬦᬫ᭄ᬧᬶᬢᬸᬢᬸᬃᬳᬧᬂᬢᬸᬲᬶᬂᬤᬤᬶᬩᬶᬬᬸᬢᬤᬶᬤᬸᬭᬶ᭟